Enpresa askok esperientzian edo merkatuko prezioetan oinarrituta kalkulatzen dituzte aurrekontuak, lanordu bakoitza benetan zenbat kostatzen zaien zehatz-mehatz jakin gabe. Horrek eragin dezake lan handia egitea espero den errentagarritasuna lortu gabe.

Benetako orduko kostua ezagutzeak aukera ematen du enpresaren kostu finkoen funtsezko zati bat kalkulatzeko, tarifa egokiak finkatzeko, aurrekontuak segurtasun handiagoz egiteko eta datu errealetan oinarritutako erabakiak hartzeko.

Helburu horrekin, AROTZGI & ACEVIk tresna espezifiko bat jarriko dugu abian, zuraren sektoreko enpresek orduko kostua erraz kalkula dezaten.

Gainera, proiektu sektorial bat da. Zenbat eta enpresa gehiagok parte hartu eta emaitzak modu erabat anonimoan partekatu, orduan eta hobeto ezagutuko dugu sektorearen errealitatea, eta elkarrekin lan egin ahal izango dugu enpresa lehiakorragoak, errentagarriagoak eta erakargarriagoak eraikitzeko.